ИСЦЕЛЕНИЯ У ГРОБА СВЯТИТЕЛЯ ИЛАРИОНА

 

 Града Суждаля церкви Воскресения Христова священника Василиа служебница его, девица, именем Ксениа, мучима бысть демоном два лета. И всячески та девица ко гробу святителя Илариона митрополита, егда ему, непогребену еще сущу, в церкви Благовещения пресвятыя Богородицы стоящу, с верою приходящи, моляшеся Богу прилежно, да от таковаго мучителства молитвами Илариона митрополита свободитися. Пребысть же тако приходящи с усердным прошением чрез девять дней, и от демонскаго мучителства молитвами его свободися. Еже той священник, видя таковое чудо, на хартии рукою своею, извествуя, написа. И подписа сице: «Града Суждаля церкви Воскресения Христова пресвитер Василей Федоров сын Устиновых сие свидетелствовах и рукою моею подписах». И оная девица, во время Божественныя литургии и вечерняго пения при гробе преподобнаго Илариона пребывающи, виде Илариона митрополита архиерейскими священными одеждами облечена, со двема диаконома стояща, даже до окончания службы. И сие виде, оная девица во вся тыя дни в ня же прихождаше. В конечный же день девица она, пред литургиею пришедши, приступи ко гробу святителя Илариона митрополита, во еже бы лобзати десницу его. И виде, яко святитель Божий, воздвигши десницу свою, благослови ю'. И по вечернем пении панихиду слушала. На священней же литургии, егда Херувимскую песнь пояху, тогда оную девицу, невидимо некто, тихо по главе ударяя, из церкви изыти повелеваше. Ей же, в притвор церковный изшедшей, тогда дух, мучащий ю', поверже абие на землю, и сотвори ю', аки бездушну до времене заамвонныя молитвы. От того бо времене та девица в себе прииде, и позна, яко от демонскаго мучения свободися, ибо легка и здрава сотворися. Чесого ради Богу в Троице святей славу, честь и благодарение усердно воздаваше. Мощем же преподобнаго Илариона митрополита поклонение с лобзанием десныя его руки (ея) сотвори. И от того времене бысть здрава.

 По преставлении святителя Божия Илариона митрополита по плоти племянник его, приказу Болшаго Дворца дъяк Павел Иванов, в Суждале быв. И по преставлении его ко гробу прииде, желая конечное от него прияти благословение. Тогда иеромонах Мефодий, духом ревности суще подвижен в день неделный, по совершении всенощнаго бдения ко гробу святителя Божия приступив. И сотворив молитву Иисусову, рече, яко к живому, сице: «Владыко святый! Се, здесь пришед, любезнейший племянник твой последняго твоего архиерейскаго благословения усердно просит. Подаждь убо ему, яко же хощет Бог!» И сия троекратно изрече. От граждан же един некто Федор Иванов сын Лужнов, тамо бывый, сия словеса слышав, зело усумнеся. И в себе помышляше, како сей иеромонах, к мертвому приступив, аки от жива суща, сроднику его благословения просит. Или непщует его жива быти суща? Его же, мы вси вемы, известно многи дни мертва суща. Сия же ему, помышляющу, и Мефодию третие прошение исполнившу, абие оный гражданин от гроба архиерейскаго глас услыша некий умерен, изшед извествующ, яко и от мертваго, аки от жива суща, благословения просяй приемлет, и ищай обретает, и толкущему отверзается. И простре из гроба десницу свою, и благослови племянника своего. Сей гражданин неложно извествова тако быти: «Града Суждаля посадской человек Федор Иванов сын Лужновых от гроба архиерейскаго глас слышал и рукою своею подписал».

 В 1749 году месяца июниа в 21 день вышереченным Федору Лужнову, со иеромонахом Мефодием о произшедшем гласе от гроба святителя Илариона разглаголствующим, и тогда ему иеромонах Мефодий советова сице: «Аще ти впредь, когда случится каковая либо скорбь быти, тогда призывай к себе на помощ всечестнаго отца нашего Илариона митрополита. Всем бо имать таковым помощник быти». И не в долзе по сем случися у того Федора Лужнова зелно ноге болети. Вреда же и язвы на ней никакова не было, но внутри гнила кость его и целое лето тем болезноваше. Тело же его труждашеся и яко огнем велми горяше. И пребывая тако неколико дней, воспомяну слово Мефодиево, еже рече ему в потребах и болезнях на помощ Илариона митрополита призыва. Тем и рече в себе: «Боже милостивый! За молитв отца нашего преосвященнаго Илариона митрополита даруй мне от сея болезни исцеление!» И по словеси сем абие преста болети нога его. Он же, возлегши, почи. И потом обозрев ногу свою, яко на оном месте плоть его разседеся и мало мокроты из нея изтече. И к тому бысть нога его здрава, яко же и другая.

 Земледелец некий пределов Суждалских прииде ко гробу преподобнаго Илариона, благодарение ему воздая, вопрошен же бысть от ту сущих клириков, чесо ради сие творит, исповеда и не отвержеся, глаголя: «Яко отец ми он есть». Тии же его паки вопросиша, како сие бысть. Он же рече: «Болен аз бых внутреннима моима лета доволна. И во едину от нощей по тяжкой моей той болезни мало нечто уснух. И се старец благолепен и честен, оболчен святителскою одеждою, став надо мною, рече ми: „Хощеши ли здрав 6ыти?“ Аз же бе, чуя еще оную лютую свою болезнь, прослезихся и воззопих: „О отче мой! Помози ми!“ Он же повеле ми призывати в помощ Илариона митрополита Суждалскаго, глаголя: „Не инако целбу недугу своему получиши“. И абие невидим бысть. Аз же от видения онаго убудився, рад бысть обрет своего целителя, начат звати с плачем, глаголя: „Отче Иларионе! Милосердовав о мне, помози ми“. И по мале времени внутренняя моя от тоя нестерпимыя болезни исцелеша. И есмь ныне ко всякому делу от толе мощен и удобен, его же убо лета доволна не мог творити».

 Во дни архиерейства преподобнаго Илариона клирик некий желаше сана пресвитерска. И абие по желанию его не бываше. Той же притече к некоему волхву и свое желание ему поведа, ища от него в сем случае помощи, да послет ко архиерею Божию служащия ему духи, во еже бо обратили сердце его архиерейско, и улучили ему сан священнический. Даяше же волхву оному и дарования нескудно. Еже приимши волхв у онаго клирика, обещася по воли его сотворити. И тако он, обнадежен сущи, отъиде, радуяся, в дом свой, яко бы самое желание свое получив. Посем прошедшу некоему времени прииде к волхву оному, желая от него прошению своему извещение прияли. Волхв же глагола ему: «Не вем, како ти помощи, понеже посланнии мною не имеют времени к нему приближитися, ниже на преддверие келлии его. Ибо праздна его никогда же обрести могут. Токмо сами с бедою ко мне обращаются. И аз от них за сие приемлю пакость немалу». Той же клирик паче належаше, стужая ему, и даяше вящшая дарования, да паки понудится прошение его совершити. И едва на сие той дерзнути восхоте, глаголя ему: «Се единою пошлю к нему моя други. И аще не возмогут полезная ти сотворити, к тому не стужай ми прочее, да не и ты со мною велие зло постраждеши». И тако по сем паки единою покусишася демоны послати. Но и тии, паки возвратишася безделны к пославшему их, и много язвиша его за сие, яко тамо понуди их итти, идеже никакоже приближитися могут. Тогда волхв всеконечно стужающему си клирику отречеся, да не к тому о сем ему воспоминает, яко на теле своем имеяше язвы великия за дерзость таковаго дела.

 Написашася сия вся по извещению иеромонаха Мефодиа, иже при келлии святителя Божия Илариона митрополита вящше дванадесяти лет живяше, и от самых его архиерейских уст много слышаше. Некая же от инех, во обители его живших, и своими си очесы на вся дела его зрящих. Мы же доволни суще, елико слышахом от достоверных, во оно время бывших повествователей, воистинну яко писахом ничтоже ложно, Бога совести своей свидетеля представляюще. Аще же кто от боголюбивых в сию историю вникнет, и вышеестественное нечто уразумеет, тому да милостив будет Господь, яко удобь поползновенно есть естество человеческое к разумению.

 Но мне потреба святаго Софрония слово: «Не буди ми лгати на святыя. Аще же где явится в чесом неисправно, да милостивнаго сподоблюся прощения. Понеже человек сие писал бренный, и многими грехами отягченный».

 

ПО ПРЕСТАВЛЕНИИ ЕГО В МИМОШЕДШИХ ЛЕТЕХ

О ПРОИСТЕКАЕМЫХ ОТ ГРОБА ЧУДЕСЕХ ЕГО.

 

 В 1756 году сентября 3 дня коллежскаго ассесора Николаа Иванова сына Вырубова, жена его, Евдокиа Данилова, которой зделалось приключение страшное в болезни, разошлись бо главныя ея челюсти, и зделалась тупость в языке, так что с великою нуждою и говорила. А как стала она просить всемогущаго Бога чрез святителя Христова Илариона митрополита Суждлскаго о исцелении той ея болезни, то того же сентября 30 дня от той болезни совершенное исцеление получила. И главныя ея челюсти сошлись и говорить стала по-прежнему молитвами преподобнаго.

 В 1764 году суждалскаго купца Венедикта Иванова сына Шарышева, вселися в дом его нечистый дух демон. И многия пакости деял, камением и кирпичем метал, и пол колол, и столом в потолок метал. Молитвами святителя Илариона митрополита из дому того изгнан бысть.

 В 1765 году маиа 20 дня Суждалской провинциалной канцелярии товарища воеводскаго сын его Василий одержим был болезнию опухолию горла. И толь тяжкая болезнь к горлу его приступила, что он вовсе и говорить не мог. И того ж месяца служили при гробе святителя Илариона панихиду. И по отслушании панихиды масла древяннаго, над гробом горящаго, взяли. И каконым маслом горло болящему помазали, да и внутрь малую часть пустили, то в ту же минуту оный болный харкнул. И в том харкании часть запекшияся крови с гноем из горла его вышла. И тако благодатию Божиею и молитвами святителя Илариона исцелел.

 В 1765 году маиа 25 дня Юрьевскаго уезду Полскаго села Флоровскаго крестьянина Андреа Петрова, жена его, Дариа Прокофьева, пришла в соборную церковь с сестрою своею, девицею Натальей Прокофьевою, нося на руках своих младенца. И сказывали, сей, де, младенец от прошлаго 1764 года маиа 29 дня до праздника Рождества Христова был во всем здрав. А при том уже и на ногах стоял. От Рождества же Христова посещен был тяжкою болезнию так, что левая рука и обе ноги отнялись и были вовсе нечувственны даже до Великаго поста. Почему они и обещались у святителя Илариона митрополита отслужить три панихиды. И по отслужении панихид на первой неделе Великаго поста руки и ноги у того младенца пришли в первое состояние. И поныне милостию Божиею и молитвами святителя Илариона той младенец находится здрав и яко ни в чем вредим.

 В 1766 году в июле месяце суждальской купец Иван Власов сын Силуанов, у коего была в горле толь тяжкая болезнь, что говорить, пить и есть совсем было ему невозможно. И так оная болезнь уста его расперла, что и на путь смертный был изготовлен по христианскому обычаю. И тогда он, пришед с великою нуждою ко гробу святителя Илариона митрополита, отслужил панихиду. По отслушании же, как скоро домой возвратился, чрез час от оной болезни облегчение получил. И так чрез один день в совершенное здравие пришел молитвами святителя Илариона митрополита.

 В 1765 году в феврале месяце купецкая жена Федора Петрова дочь, которой после родов зделался понос кровавой и толь жестокой, что она уже и в отчаянии живота находилась. И от оной болезни, хотя она многия лекарства употребляла, но болезнь ея до пятка первой недели Великаго поста продлилась. В то время пошел муж ея в Казанскую, что во Архиерейском доме, церковь литургию слушать, в которой церкви во время преждеосвященныя Божественныя литургии найде на него забвение или легкий сон. «И в таковом забвении увидел я [говорил он] пред собою портрет преосвященнаго Илариона митрополита. Самой тот, которой на гробе его стоит. Произносящ живо ко мне таковыя слова: «Ты стой здесь, а я пойду». Что я, услышав, от онаго сна пробудился, и в крайнем восторзе достоял литургию. А притом в таковой надежде, что непременно хощет Бог ходатайством святителя Илариона жену мою от одра болезни воздвигнуть. Которой надежды и не лишился, и по окончании литургии зашел в соборную церковь и над гробом его панихиду отслужил». По сем в скором времени милостию Божиею и молитвами Илариона митрополита та жена совершенное исцеление получила.

 В 1765 году сентября 6 дня Суждалскаго уезду, Зарецкой десятины, села Доронина, церкви Преображения Господня священник Дмитрий Петров с женою своею Марьей Стефановой, пришедши во время вечерняго пения в Суждальскую соборную Рождества пресвятыя Богородицы церковь, священнику соборному Ивану Федорову объявили: «Я де посещена была болезнию, слепотою глаз, от маиа 12 сего года, и по сие время вовсе почти ничего не видела. Услышавши же, что при гробе преосвященнаго Илариона митрополита поют панихиды, призывая его в помощ от различных болезней, чему подражала и я. И как толко призвала его в помощ, святителя Христова, о исцелении глаз своих, обещаясь итти в Суждаль и над гробом его панихиду отслушать, то в той же день зрение очам своим получила. И по ныне милостию Божиею и молитвами святителя Илариона митрополита вижду ясно, и аки бы никогда глазами моими не болела».

 В 1765 году октября 11 дня капитана князя Петра Григорьева сына Вяземскаго, жена его, Анна Александрова Вяземская, бывши чревата, и до рождения за три месяца мучило ее, аки бы пред родами. И думала совершенно, что младенец из утробы ея извержется. Однако сверх надежды прошлаго 1764 года августа 4 дня зделалось ей привидение. И явися преосвященный Иларион митрополит во сне, сказав сии слова: «Имей надежду на Илариона митрополита, он тебя избавит от болезни сея». И по видении том, тот же час проснувшись, вздумала, что многие притекают к его целбоносному гробу, и в болезнях на помощ его призывают. Стала и она вначале Господа Бога и его угодника просить о исцелении своей болезни, обещаясь ехать в Суждаль ко гробу его и панихиду отслужить. И тот час от оной болезни облегчение получила. И младенец, о котором думала, что безвременно извержется, здрав родися. И сие объявление в Суждалском кафедральном соборе за подписанием руки ея хранится.

Сие житие святителя Христова Илариона митрополита списано с настоящагоподлинника, находящагося во Флорищевой пустыне в монастырской книгохранителнице, слово в слово 1813 года в феврале месяце.

Панорамы
Флорищевой Пустыни

<meta name='yandex-verification' content='7af37feea4259e23' />

Помощь свят.Илариона.png

606091, Россия, Нижегородская область, пос. Фролищи, Свято-Успенская Флорищева пустынь, 

Тел: 8-930-806-30-60; тел./факс: (83136) 662-34  E-mail: florizheva@yandex.ru